أسم الكتاب : سيرة الأراجوز

المؤلف : خالد عبد القادر

التصنيف : شعر عامية

الطبعة الأولى : 2007

تصميم الغلاف : عمر مصطفى

الأخراج الفنى : عمر مصطفى

السعر :  15 جنيه مصرى

لِعلمِك

لمّا بقابلِك

مبعرفش اقولك ,

ميرسي.. و مي تو..

و سي يو.. و باي

لأِنّي.. إتيكيتي شعبي

كلامي بقلبي

لا بعرف أزخرف

و لا اعرف أخبي

و برضو لعلمِك

مبعرفشِ أربُط

كرافِتة و اخنق

 رقبتي زيادة

و قمصاني سادة

كُحلي و إسود

ساعات بُنّي غامق

..

..

كمان و بصراحة

عشان ابقى صادق

مبعرفش أي أصول فِ الشياكة

و لكنّي بعرف..

أجمّع شوارع مدينتِك

و اخليها توكة ,

تنام بين ضفايرِك

و اضُم البيوت عَ البيوت..

و اغزلها بيني و بينِك خيوط

و اغزل حجاب

و بعرف أخلِّي الكورنيش ده باب

و اعرف أخلِّي النيل ده يظهر

من غير باروكة

تشوفيه شباب

و اخلِّي انعكاسة عيونك بكفُّه

أحلى فِلُوكة

..

..

مبعرفش آخد بإيدِّك في رقصة

و لكن حقيقي .. حقيقي

بفكر في رقصة معاكي

بقولها بجد..بدون أي ضحك

تعالي و بُصّي

لمّا عنيكي عليّا تبُص

قلبي بيرقص ..